龔嘉欣稱有判斷力唔信「新歡」系媾女王 33歲有拖拍好正常默認戀情

龔嘉欣早前帶埋密友出席好姊妹陳凱琳（Grace）新年飯局，因Grace上載飯局片到社交網而誤泄嘉欣「新歡」原來是日籍甜品師松岡哲也。為怕戀情見光死，嘉欣雷劈都唔認拍緊拖。

不過唔認還唔認，對於「新歡」被踩系「蒲精」及「媾女王」，嘉欣就非常肉緊為呢位「了解中」的朋友護航：「咁大個人，認識朋友有判斷及分析力，我只相信自己慨感覺。」

採訪：方騫平 攝影：譚志光 化妝：Henry Li 髮型：Sue Cheung 服裝: Marimekko 場地：Studio Meta

龔嘉欣於TVB新劇《新四十二章》中黐須演出，獲網民大讚她造型可愛，對此，她開心說：「最初黐須都覺得醜樣㗎，唔系個個女仔接受有須，嗰段時間黐到皮膚敏感，塊面起曬紅點。」

唔止咁，嘉欣拍煞科打戲時仲受咗傷：「對打期間聽到鼻樑位啪啪兩聲，踎低已經系咁流鼻血，心諗死喇，唔知會唔會毀容呢？第一時間叫大家唔好驚住，畀塊鏡我照嚇先，因為要趕埋尾，我拍埋第二朝先有時間睇醫生，拍呢個劇大家都辛苦了。」

搵有承擔結婚對象

除咗龔嘉欣，「少婦聯盟」好姊妹沈卓盈、陳凱琳和譚凱琪個個「升呢」人妻及人母，而且個個嫁得好，相反嘉欣打到傷痕累累，問到男友可有叫她疊埋心水做少奶奶？她即連聲否認緋聞，猛耍手擰頭說：「唔系唔系…」

仲解釋：「我覺得自己30幾歲呢個年紀，對感情好認真，希望搵到結婚對象，尤其身邊朋友經已建立家庭及有小朋友，喺渠哋身上睇到照顧小朋友唔容易，好多嘢要有打算，所以諗另一半除咗睇夾唔夾，最重要目標系咪一致？

都要有個長遠了解，唔系咁簡單，家都系了解中。既然有咁多人祝福我，我都覺得開心及接受，系好事嚟慨，但對我嚟講，去到結婚一刻先會同大家分享喜悅，focus返工作上，因為近年作品咁有發揮，演戲系我第一份工作，家仲Keep住團火…」

她又指對方系圈外人，唔想講太多渠慨嘢，包括點樣認識。

坦言介意男友花心

嘉欣保護戀情同時仲為靚仔「新歡」護航，對於松岡哲也被起底花弗兼愛夜蒲，2018年又曾與蔣家旻行埋。她堅稱只相信自己眼光：「我覺得唔止男女朋友，就算朋友之間，每日身邊都充斥好多謠言及是非，同一個人相處用自己慨感覺，去感受對方系咩人，同埋咁大個人都有分析及判斷能力。」

至於系咪介意另一半花心？她大笑反問：「邊個會唔介意？不過我唔會追問人哋過去，嘩！如果做朋友要問到咁，人哋都驚咗你啦，系咪？而且關我乜事？顧掂自己先啦，我有好多嘢要做…」

講到感情事，嘉欣唔覺意爆多少少：「儘管覺得距離結婚仲系好遠，但我唔敢寫任何包單，因為每一日發生慨事千變萬化，生活及生命上有好多突如其來慨事系預計唔到，33歲系適婚年紀有拖拍好正常，好多呢個年齡慨女性同時擁有事業及家庭…我家每一日過得好開心，就算有唔開心嘢發生，都學習搵到開心，感恩我擁有呢個年紀慨嘢，做人唔好太貪心樣樣都要有。」講到咁白，明就明啦。

兩年前龔嘉欣跟大馬富二代Bryan(最後一圖後排右)傳緋聞，報道更指嘉欣為事業而悔婚。