原標題：劉穎鏇被封新一代性感打女！林子善截肢角色派洋蔥

隱形戰隊｜劉穎鏇被封新一代性感打女 跣膝飛撲捉「喪屍」

TVB劇《隱形戰隊》，昨晚（6 日）首播，內容相當緊湊，除了有重要角色登場，更有大型「喪屍」襲擊群眾場面，事件驚動衝鋒隊督察Madam Q阿寶（唐詩詠飾）及反恐特勤隊成員邢風（劉穎鏇Tiffany飾）加入協助，二人合力制服「喪屍」。

Tiffany相當具氣勢，邊奔跑邊拋掉外套的她，一個飛身雙膝貼地向前滑動的同時，一個箭步已將目標箍緊及制服，盡顯孔武有力一面；打得又睇得的Tiffany，獲封為新一代「性感打女」。至於詩詠一招「拱橋」動作，盡顯腰力。

原來一個簡單「跣膝」動作，背後付出努力，Tiffany受訪時透露相關動作臨時加插，並笑指當初對「跣膝」充滿期待：「嗰場戲我哋拍到中午時，已經非常熱，嗰日太陽好猛，而當我知道有呢個動作，初頭好興奮，因為以前打開波，有時都需要跣住去救波，呢個動作我都熟悉，武指仲畀咗兩個Knee pad我。」

Tiffany補充指整個動作難度不在「跣膝」，而是角度及各方面配合：「嗰刻最難係點Make Sure每次停低，都係停啱同一個位，同埋捉住佢（喪屍）又揈開佢個力度應該點掌握，嗰一下總共拍咗32 takes。」

Tiffany不用埋位時，也反覆練習該動作：「由最初頭覺得好得意，最尾係變咗不斷諗點樣可以做啱件事，又要顧埋面部表情，都拍咗好耐，我嗰一刻已經完全忘記咗時間。」

她又感激飾演喪屍的副武指周穎箖（慧慧）：「慧慧好辛苦，佢嚇嚇都真跌，我都會好擔心佢整親，同擔心佢攰。佢真係好好，非常配合我，仲好有耐性咁教我，成件事拍到成果，係要非常感激所有人咁配合同團結。」

慧慧是圈中的女武指，擔任特技演員經驗逾20年，曾為無數女演員做過動作替身，是錢嘉樂愛徒之一，之前更因有份參演無綫綜藝節目《不可能任務》及《360秒人生課堂》逐步為觀眾熟悉及關注，是不折不扣女硬漢。

隱形戰隊｜林子善截肢角色派洋蔥 冇戒趷腳習慣 嚇壞老婆

由陳山聰﹑馬國明﹑陳展鵬﹑江美儀﹑唐詩詠﹑劉佩玥﹑林子善等合演的無綫劇《隱形戰隊》，昨晚（6日）首播。昨晚揭開4位主角Ocean（馬國明飾）、Cool Sir（陳山聰飾）、Madam Q及囡囡（林子善飾）的「子彈情仇」。

首集中身分成謎的Ocean，原來多年前與3名好友執行任務期間，向囡囡膝頭開了一槍，由於動機成疑而惹網民討論。最終囡囡因傷勢嚴重要截肢，活動能力或職場生涯均極受影響。

每次子善出場時，無論趷腳還是雙手配合動作相當像真，讓觀眾能代入其角色處境；而囡囡截肢後嘴唇發白、臉如死灰般躺在牀上的一幕，更讓人心痛。

談到飾演截肢角色，林子善透露因太長時間投入角色，以致拍完後一時三刻也未能完全「戒掉」趷腳習慣：「我有幾次趕港鐵（北角轉將軍澳），我跑跑下都不自覺趷腳，因為嗰3、4個月每日開工好長時間，習慣趷腳，後來拍完套劇個零月，耐唔耐都仲有少少趷腳，我老婆問我做乜趷腳，我係佢問先知自己趷咗。」

責任編輯：