馬國明狂吸金搶客排第二！陳豪出招保一哥位80萬廣告身價
馬明狂吸金搶客 陳豪出招保一哥位 80萬廣告身價叮噹馬頭
隨著各地開關，消費反彈，經濟開始復甦，藝人終於有返「錢」途，尤其TVB「暖男人夫」陳豪、陳展鵬、陳山聰、胡諾言，甚至連准人夫馬國明(馬明)都有價有市，穩守TVB「廣告一哥」的陳豪近期被人氣急升的準新郎馬明追擊。
馬明挾著劇集《隱形戰隊》、《法言人》聲勢後來居上，月初惠州登台，歌酬高達30萬港元；另廣告亦陸續有來。據悉，知己知彼的陳豪近日頻頻秘密出招，親力親為向舊客戶打招呼吸客。撰文：娛樂組
收緊支出3年多的商戶，最近都肯鬆啲手揼本做品牌宣傳及推擴，而形象好、又有觀眾緣的TVB人夫最搶手。據行內人報稱，逆市後TVB以陳豪（阿Mo）最硬淨，出席event叫價18萬元，拍廣告就收80萬元；隨後緊貼的馬明廣告價同陳豪叮噹馬頭，但event價暫時比陳豪少2萬元。
最強搵外快夫妻檔
不過，近期事業攀上高峯的「視帝」馬明變身「吸金王」，連續播出的《隱形戰隊》及《法言人》角色討好，兩劇收視高企，《法言人》首播最高收視21.1點，更成為今年最高首集收視的第二綫劇集， 加上年底完成終身大事迎娶湯洛雯（靚湯），「升呢」人夫再添吸引力。
最近馬明獲不少商演及搵外快機會，本月26日（下周3）馬明率先有一個廣告發布，也有斟洽他跟未婚妻拍廣告，如此搶手，廣告價亦開始有上調空間，加上馬明及靚湯都是TVB「親生仔女」，收入直接跟公司拆分，因此兩人自然成為TVB力推的最強夫妻檔，好有「食力」。
唱一粒鐘速賺30萬
所謂有智慧不如趁勢，馬明眼見機不可失狂「擸」老婆本，在復活節假期， 就算忙拍《NEWS新聞女王》，就算瞓少啲都要度期到惠州賺「人仔」，為一個由香港出發到惠州的兩日一夜旅行團擔任晚會表演嘉賓。
當晚馬明一身藍色西裝靚靚仔仔上陣，除跟葉振棠合唱外， 又獻唱「飲歌」《友情歲月》、《一生愛你一個》，期間馬明在台上不停收利是，又踎低跟圍住舞台的一眾師奶觀眾握手和合照，來者不拒，全程保持微笑，表現相當親民，到在場觀眾個個騎騎笑。
未完待續,請點擊「下一頁」繼續閱讀
