自認同吳卓羲合襯！TVB視後蔡思貝隨時飛起胡鴻鈞

她說：「我嗰時好驚，點記得邊個喺現場，佢話我行埋嚟同佢講，希望第時有機會合作，我真系唔記得咗有咁講。（對Ron印象點？）好有風度好紳士，有一對電眼，好似貓，其實望落我哋都幾襯，大家都大眼大鼻，五官幾襯，希望都有CP感，點知咁快就死，仲要一吻定情唔夠一日就無咗，幾大打擊，編劇玩到咁大。

(想同Ron再合作？）我有提議下季講番前傳，佢角色好鍾意小魚，我都想知佢點解咁鍾意小魚，拍前傳先知。」

有網民並將她與姚子羚作比較，認為她跟Ron較合襯，思貝就覺得他為查案才與子羚一起，子羚也好慘，兩個都是可憐人。

身為視後，她時刻提醒自己不要放鬆，希望每套劇都能夠做到自己和角色二合為一。

她透露疫情下居家抗疫而愛上砌Puzzle，並感性地發表「拼圖人生」，從砌圖領悟到人與人之間的微妙聯繫，一環扣一環，尋找拼圖的過程，就似人生，不斷在尋尋覓覓，問她尋找到人生的另一塊拼圖沒有？她拉開話題，稱每次見父母都感到大壓力，因父母有長期病患，故擔心父母感染。

近日經常陪伴父母打麻雀，看到父母笑容多些，自己也感開心，問她會否叫Hubert（緋聞男友胡鴻鈞）一齊打？她說：「嚇，哈哈，佢忙住唱歌呀。（同佢多咗時間聯絡？）唔會夠膽見，始終跨家庭，但會傳短訊問候，問佢有冇嘢做，同佢講我無錢呀！

（問佢攞家用？）唔系，了解嚇行程，睇嚇佢有冇工作，傾訴嚇。（早前黃大仙解簽話你同Hubert感情上有阻滯，需要磨合？）好似砌圖一樣，呢位唔啱搵第二位，哈哈！無論系乜嘢關係，人與人之間都需要磨合。」