《利瑪竇》三度公演 劉松仁拒再接戲 將下半生交畀王梓軒

最後，原定的女主角主動辭演，於是松哥找來鄧萃雯：「點知佢話你唔應該搵我，佢就介紹佢好朋友阿Kit。」松哥親自飛往新加坡與Kit接洽：「講曬成件事、講劇情，講咗幾個鍾，咁佢去廁所，佢話喺廁所聽到首歌，好似有把聲話『你要做呀』，嚇到佢即刻應承我，好好笑，我直頭覺得係神蹟！」

劇中梓軒要從20多歲的利瑪竇，一直演至50多歲，期間涉及多個造型的變化，最令觀眾驚喜的，是梓軒從未離開舞台，但卻在短時間內轉換多個造型。兩人笑住表示是他們的magic（魔法）。談到排練過程，梓軒指松哥每次都加入一同練習，即使還未正式綵排：「嗰啲即興練習都好，所有嘢松哥都一齊玩，嗰刻有冇劇本都好，成個團隊就已經喺度。」

松哥坦言非常享受創作與排練的過程：「真係好有力量，我哋演電視，係透過電視打入觀眾個心入面，影響你，舞台劇係成班一齊影響啲觀眾，好一致，好強勁嘅能量。每次我都睇到喊，唔知點解好感動。」

雖然如此，松哥卻從未想過參演其中：「我淨係想做觀眾，我唔鍾意演戲㗎，講出嚟都好笑，我唔係享受演戲嗰啲人嚟。（但你演咗40年喎？）係呀，唔通唔使食咩？」梓軒突然爆小秘密，指《利瑪竇》有機會以演唱會形式呈現，屆時有「利老竇」（利瑪竇爸爸）的角色，至於角色誰屬，請大家自行猜想。

梓軒經常稱松哥為恩師，但兩人的相處更像「好兄弟」，訪談期間有講有笑而且默契十足，問到松哥是否視梓軒為Buddy？他大笑說：「我唔理呀，我下半生交咗畀佢！」梓軒笑到差點掉在地上。

近年在幕前甚少見到松哥，坦言不會再接戲，只因所有心思擺到《利瑪竇》上：「我冇（其他）計劃，我擺曬我自己落去，我行緊最後嘅階段，裡面其中一個就係《利瑪竇》。」早前傳出他身體欠佳，松哥大笑回應：「我嘅狀況點，等你哋話畀佢哋聽。」

梓軒指松哥的精神力量非常強大：「佢一入間房係好似空氣靜止咗咁，然後嗰條虛構嘅紅地氈就出嚟。」松哥聞言表示，從電視台年代學習到何謂「壓場」，又指過去自己太嚴肅：「後生嗰陣我好嚴肅，因為好集中諗緊點演點演，直到有次我同陳玉蓮拍嘢，佢啱啱相反。佢一入廠『點呀你哋？』好開心嘅，我嗰時學到嘢。於是，我以後返屋企見到阿媽就要笑，嘩，好有力量，我係假（笑）㗎，啲肌肉硬㗎，我唔理我E（E起棚牙），E到我真係有個笑容出嚟，母子關係產生幾大變化。以後同人傾偈傾咩都畀個笑容先，遲兩秒講都得㗎，呢樣好嘢，唔好睇少笑容。」

松哥對演藝事業如此投入與熱愛，是否永不言休？他說：「唔理咩圈，我後生都講，無論我掃街又好、演戲又好，做咩都好，都係服侍我學習做人，所以喺邊個環境都無所謂。」