原標題：譚俊彥被問父親狄龍與姜大衛40年恩怨

譚俊彥被問父親狄龍與姜大衛40年恩怨：唔關我嘅事唔講咁多

譚俊彥今日（12日）出席好友陳煒醫美品牌開幕典禮暨代言人簽約儀式，分享對方當老闆娘的喜悅，他接受訪問表示：「你睇嚇陳醫生嘅老婆有幾靚，就知道佢幾靠得住，親自嚟祝賀佢哋，希望佢哋生意興隆。」他續指知道陳煒與老公一向恩愛，並且送上祝福。

提到姜大衛（John哥）較早前接受訪問回應與狄龍40年恩怨，John哥更指「狄龍個仔叻㗎，叻過我個仔㗎」，他表示：「我知，佢客氣啫！如果真係有睇咗嗰個報道，佢都講咗冇得比較，同埋佢話我現在叻啲啫，我入行長過佢呀嘛，都冇話叻唔叻，只不過唔想比較。」

講到多次傳出姜大衛與狄龍不和，他坦言：「唔係真嘅嘢，我就唔去批評啦！因為我覺得好多時候都會，我同你做訪問我講咗二十句，就將一句咁樣講咗出嚟！我唔希望網上啲人講咗唔係真嘅事件出嚟放大，咁我又覺得人哋幾廿年嘅嘢，你又記唔記得人哋小學爭個擦膠，你冇得咁講，同埋唔關我嘅事嘅嘢都唔講咁多。」

至於有否見過John哥，他說：「我同佢合作咗好多部戲，《失憶24小時》開始同《企業強人》，嚟緊嘅《麻雀樂園》都有同佢合作，我覺得我係一個個體，爸爸都係一個個體，就唔會將任何呢啲嘢帶到去拍攝現場。」

姚子羚勇闖柬埔寨登台遺憾冇得行街　被問當地安全性：小心啲囉

姚子羚今日（12日）出席好友陳煒醫美品牌開幕典禮暨代言人簽約儀式，分享對方當老闆娘的喜悅，她接受訪問表示：「我頭先都有問陳煒話美容院都開咗張，佢都有話遲啲過嚟啦！想有啲乜嘢都可以過嚟做啊！」

提到最近飛往柬埔寨登台演出，她興奮表示：「係呀！其實啱啱呢兩日先返到嚟香港，真係有啲遺憾唔可以出去出邊行嚇，如果夠時間我都好想去行嚇。」

講到網民留言指姚子羚勇闖柬埔寨登台，無懼「KK園區」事件，她坦言：「咁我都有問過，相信安全性係OK嘅，公司有擔保同我做呢樣嘢，都有人同我去。又唔好話非常去擔憂，我都覺得唔係淨係呢個地方嘅，其實有好多地方都有呢啲事情發生，小心啲囉。」

被問到「胡說八道Girls Night世界巡迴演唱會」會否在香港演出，她表示：「呢個都好希望，其實一路我哋都想，我諗香港可能有機會係最尾，未知，如果有主辦方想邀請我哋梗係非常開心，目前都係希望去東南亞先，都想去返啲近少少嘅地方。」

她繼續指大家都各有各忙，並透露：「前排同李施嬅佢哋食飯慶祝生日，我都唔得閒去到，所以要約得到大家一齊去做一個騷都係唔容易。」講到香港站會否以紅館為目標，她直言：「真係有啲難，紅館係好多歌手嘅夢想，我諗未必，都有諗過度過可能會喺亞博或者會展，不過我哋未有確定。」