藝人胡鴻鈞、羅天宇和何依婷等今晚(22日)出席TVB台慶劇《十月初五的月光》首播活動,他們異口同聲表示劇組上下為演出付出不少,挨更抵夜之餘,還要忍受暴曬,即使天宇皮膚容易敏感,但仍頂硬上開工。
天宇透露該劇由冬天拍到夏天,由於戲服全是大褸,冬天開工的確舒服,但夏天卻拍到底褲都濕透:「我都有帶定一、兩條喺車度替換,啲衫就掠乾再過。」
依婷被問到也拍到內衣全濕?她笑說:「我冇留意喎!不過我有攝啲冰袋喺衫入面,半個鐘頭換一次。(咁咪顯得好有身材?)好細包啫,同埋啲衫太厚,記得有一日我仲拍到出現熱衰竭,有少少中暑,要睇醫生同食藥。」
面對天宇爆汗,依婷自言身上香水味太香,故完全聞不到對方臭汗味。
天宇即自爆於等埋位時也發生意外:「我落樓梯差錯腳拗柴,整親右腳,胡鴻鈞又系整親同一邊腳,大家都有意外,好孱弱。」
拍攝遇意外
而胡鴻鈞對於拍攝時曾發生意外導致骨裂,不諱言是好事:「我入面見紅嘛,代表收視會『長虹』。」
他更指不擔心外間把該劇新舊版本作比較,認為所有事都已成定局:「我系非常期待嘅,之前監製剪完片我都忍住唔睇,等首映先睇。(有冇叫緋聞女友蔡思貝捧場?)冇特別叫朋友睇,好嘢自然有人欣賞,唔需要刻意宣傳。」