原標題：中年好聲音2丨黃劍文密密開LIVE唱歌陪歌迷

中年好聲音2丨黃劍文密密開LIVE唱歌陪歌迷

三隻愛貓輪流曝光勁可愛搶曬鏡

《中年好聲音2》中，黃劍文在網上投票上獲得票選三甲的位置，可惜最終未能憑人氣打入最後三強，最終在比賽中止步，不少網友都戥佢感到可惜。黃劍文沒有失望，他直言在聲線不在狀態之下已經表現得最好，無悔無怨。

完成比賽後，劍文都沒有放棄，連日來在屋企不時拉埋好友們一齊開網上直播唱歌，以歌會友，期間他家中的愛貓意外曝光，原來劍文是三隻貓咪的爸爸。

黃劍文是愛貓之人，IG經常都見他分享跟貓咪的生活日常，近排密密開直播唱歌的他，貓貓都有意外在鏡頭曝光，不少網友聽歌之餘，更望實畫面期待貓咪驚喜現身，非常搞笑。

黃劍文家有三隻貓咪，兩隻豹貓分別是Alpha同Omega、一隻雪豹叫細粒，牠們的身軀比一般家貓大隻，而且身上的豹紋非常明顯易見，當劍文直播期間不時會在附近徘徊，劍文或者有時會抱起牠們不斷「錫錫」同「吸貓」。

劍文接受本網訪問，他表示：「我九至十年前已經Follow咗豹貓，覺得好靚好得意，心想養但冇諗住買，咁啱我朋友養嗰隻豹貓生咗BB，就問我有冇興趣養，咁我就領養咗Alpha同Omega，而家已經1歲零10個月大。

而另一隻只有10個月大，佢係女仔身形比較細粒啲，所以佢英文名叫細粒，英文名叫『Little Love』。我覺得貓狗都係人類朋友，佢哋畀到我就係愛，所有愛都要建立，貓表達愛嘅方式都有，好多人覺得貓好高傲唔睬人，但豹貓係相對地熱情，而且用時間同心機建立份愛。」

劍文的IG所見，跟一般的貓咪不同，他經常都會帶貓咪出街，而且一齊行山，似乎貓咪都不怕人，他表示：「可能係我由細湊佢哋大，建立咗個信任關係，我睇過好多外國人養豹貓，都係會帶佢哋出街，甚至遊山玩水同雪地上跑來跑去。

我見到佢哋係鍾意，因為豹貓活力勁啲！當然每隻貓性格都唔同，Alpha會鍾意行山，佢會帶住我周圍去，而Omega比較懶少少，所以唔會帶佢行山，Omega行沙灘或者平地就可以。」

行完山或者去完沙灘之後，劍文都會為貓咪沖涼，由於貓不可能經常沖涼，所以他一個月可能只限出街一至兩次，或者輪流出動，「佢哋唔怕人呀，有時路過有人想影合照，佢哋都冇問題，唔會出爪抓人。」

劍文感激Alpha、Omega同細粒的出現，事關之前一直飼養的兩隻病貓分別去年和今年過世，兩隻貓貓患腎病長達三年。

「之前照顧佢哋兩隻老貓，每日三餐喂藥，加上早晚要打皮下水，所以精神狀態麻麻，成日擔心佢哋身體情況，搞到個人好唔開心。當時兩隻豹貓嚟到，反而佢哋嘅活潑為我帶來活力同快樂，反而照顧兩隻老貓時候，心情會輕鬆好多。貓狗陪伴嘅力量真係好大。」

Alpha同Omega都算乖巧聽話，劍文笑言樂器的聲音較尖銳，所以牠們都似乎不太欣賞他在家中唱歌彈吉他，但細粒就剛剛相反很享受。