方力申激愛女友大讚6大優點！拍拖年半有心有力拒奉子成婚

小方坦言疫情令工作及收入大減曾懷疑人生，「自己係一個乜嘢演員呢？」及「有冇入錯行？」𠵱家有返自我肯定的價值：「通過努力，證明有付出係會做得到嘅，我係稱職演員，對得住份職業，唔搵我係你嘅損失！」

共同興趣睇畫行博物館

最近小方舉家游日本賀母親70歲大壽，雖然唔願透露女友葉萱有否同行，但就自爆兩人有過甜蜜旅程：「之前我同佢曾秘密外游，佢唔鍾意行百貨公司及名店，搞到我都冇買嘢，就算朋友代訂推介餐廳，佢都話唔好，『邊行邊食就算。』」

小方對葉萱讚不停：「佢對物質冇乜要求，樸素簡單好容易滿足，呢個係我欣賞佢嘅地方，因為自己都係好簡單嘅人，我哋經常去茶餐廳飲奶茶。」

因為葉萱的簡單令小方另眼相看：「喺呢行咁多年，冇認識一個咁嘅人，(係咪會加分？)係好啱我，因為我哋好夾，哈…尤其係佢唔使錢，我冇錢可以使，我哋嘅共同興趣係睇畫展及參觀博物館。」

44歲有心有力父母催婚

另外，44歲的小方月前在《世界先進游泳錦標賽》分別奪得銀牌及銅牌，追問會否襯有心有力之年成家立室？

他帶點尷尬笑說：「咁唔止得呢幾年(有心有力)，可以去到好長時間嘅，順其自然啦，我心中有plan，講出嚟就冇驚喜啦，但放心，我唔會奉子成婚，(咁安全㗎咩？)咁樣唔得㗎。」