王敏奕曾國祥被傳婚變曾志偉開腔回應：離婚幸福咪由得佢哋離囉

王敏奕（Venus）與曾國祥在2019年於北海道舉行婚禮，婚後二人一直表現得非常恩愛甜蜜。不過近日突然傳出二人婚變，有指王敏奕將其IG上與曾國祥的合照全部刪走，甚至乎連「紋身婚戒」亦都無得留低，婚變傳言甚囂塵上。

今日（26/4）王敏奕現身電視城出席TVB劇集《婚後事》造型記者會時，老爺曾志偉陪同在則，就婚變傳聞作出回應。

曾志偉笑言：「話佢哋婚變，一聽就知道係假啦。兩日內話我坐輪椅，又話我個仔離婚，真係無得頂。大家咁關心我，但係全部都係假。唉，不過我哋做演藝界始終有人提，總好過冇人提。但呢件事始終都係傳言，咁所以都係得啖笑啦。我有搵過我個仔，但佢又冇覆我。心諗早兩日先同佢哋兩個食過飯，冇理由咁快離婚㗎。（會唔會真係離咗婚，你唔知？）嗰日好似係，但後尾第二日結返，哈哈！（係唔係擔心venus要回應，所以現身？）我唔擔心，如果佢哋離婚係幸福嘅，咪有得佢哋離囉。不過有時啲嘢真係好好笑，我哋做呢行，如果樣樣嘢都緊張嘅話，就唔適合做呢行。」

對於刪走IG所有同老公的合照，Venus就這樣解釋：「其實成件事都得啖笑，婚變係假。而手上紋身方面，係因為拍嘢嘅時候係要遮。而IG啲相係公司啲PR決定，要我整理一下。（為今次劇集宣傳！）冇呀，絕對冇宣傳成份喺裡面，同埋刪相個件事喺3個月前已經做咗。不過裡面有啲珍寶嘅嘢係冇刪走到嘅。」

王敏奕傳婚變後首亮相曾志偉突現身：冇擔心過

藝人王敏奕（Venus）近日在社交網刪走與老公曾國祥的合照及婚照，因而傳出離婚消息，近日正拍攝有關婚姻危機題材劇集《婚後事》的她，認真應景。

王敏奕下午在將軍澳電視城出席新劇拜神，TVB總經理兼她的老爺曾志偉突然現身支持。兩人隨後一齊接受訪問，志偉被問到是否來撐新袍場？他笑說：「新袍唔使撐啦，佢咁多嘢做，我都唔記得呢套劇有佢，今日嚟系撐林肯，劇本寫得好好，好貼地。」

志偉被問到兒子曾國祥與新袍王敏奕傳婚變？他指明知事情是假，故沒有擔心過：「冇留意，因為對上一晚先同佢哋食完飯，第二日就話佢哋離婚，個進度有冇咁快呀，之前夠話我要坐輪椅啦，等我睇嚇系咪犯太歲先。」

王敏奕則親身否認婚變：「反而要同一啲相信咗，擔心我哋嘅人講聲唔好意思，屋企人反而唔擔心。（點解刪除曬啲相？）因為工作關係，想整理下用工作相為先，冇諗過咁做會令到大家咁擔心。（洗咗婚戒紋身？）冇（展示手指紋身）。（老公知唔知呢件事？）佢返咗嚟兩三日，已經返咗去英國拍嘢，我都有轉發畀佢。」

講到劇中她與羅子溢、羅天宇的激情親熱戲，老公是否不能看？志偉即搶答笑說：「所以咪冇眼睇走咗囉。」王敏奕則指老公一向不會幹涉工作，所以也不用「備案」。