封肚宣布不再生寶寶！楊茜堯做番全職媽媽
封肚唔再生！楊茜堯做番全職媽媽恨拍劇「抖氣」
去年底再做媽媽的楊茜堯（前名楊怡）為老公羅子溢（前名羅仲謙）誕下麟兒，與大女「珍珠」湊成一個「好」字，一家四口生活，幸福美滿。由劇集《家族榮耀》女主角，回歸全職媽媽身份的她，親力親為湊住兩個小朋友，直言比拍劇還辛苦。
她透露母親節會與家人留在屋企簡單慶祝，她笑言：「湊BB真系好攰，辛苦過拍劇，生完大女半年就去咗拍《家族榮耀》，已經唔記得咗湊初生小朋友挨更抵夜嘅感覺，依家所有感覺返曬嚟，有過之而無不及，亦戥我阿媽之前辛苦。阿仔就更難搞，好活躍、又大食，仲成日夜晚醒咗，令到我哋都瞓得唔好。老公又拍緊劇，唔系佢出勞力抱嚇、凼嚇瞓覺都好幫到手。」
她的一對仔女也是在疫情下出世，身為家長面對的巨大壓力可想而知，她說：「呢個世代好多人都唔生，有疫情就更加，我兩個都系『疫情寶寶』，疫情下要面對生存、抗疫問題，出街要戴口罩、冇得周圍去玩，身上唔系香水味、系酒精味，大人、小朋友都好大壓力，要學習忍讓，理解佢哋嘅情緒。」
她與時下家長一樣，靠上網學習教育小朋友的心得，同時亦讓自已學習做個更好的人：「湊小朋友好多時都會忟憎，自己都多咗反省，因為要身教，唔想佢學咗自己啲唔好嘅嘢，要學習點樣同小朋友有溝通。」
擔當做「衰人」
管教小朋友茜堯擔當起「衰人」角色，令到她在女兒心目中的地位下跌，她說：「個女唔食飯發脾氣，亂掟嘢，都會罰佢獨處一陣，等佢冷靜嚇，知道做錯。老公少佢所以都系做好人嘅角色，變咗個女好黐佢，爸爸又容易心軟呢，有乜就向爸爸求救，個女最鍾意婆婆、老公、工人姐姐先到我，我排位好低。不過，教小朋友大家就要配合，放手畀一個人去教。」
兩個夠曬數
喜歡小朋友的茜堯與子溢，兩年抱兩達成心愿，對再生BB她則耍手擰頭：「兩個夠曬數，應該唔會再生，都同老公傾過，除非肯定再生系女先會再生，但邊有得肯定，呢刻唔會再生，真系好攰。」
事業上，茜堯久休復出主演的《家族榮耀》大受歡迎，但她因要照顧小朋友，拍劇預計最快要明年，她說：「如果唔系疫情都會返內地商演，同埋去外地登台，都要搵奶粉錢，儲多個錢，畀仔女有舒適生活，但疫情要隔離就唔划算，有好劇本都想出去拍劇，順便可以休息嚇，抖嚇氣，哈哈。」
濕身透黑Bra！楊茜堯激曬火辣孕照紀念懷孕時光
去年底再做媽媽嘅楊茜堯表明「封肚」唔再生，坦言湊兩個小朋友唔容易，今日（8日）母親節，佢就喺社交網曬出佗第二胎時嘅絕密大肚寫真，紀念珍貴嘅懷孕時光。
相中見佢著上短版白色衫內配黑Bra，不但露出孕肚兼Deep V開胸勁騷事業線，仲大玩濕身誘惑，全身噴滿水令白色衫透視出黑Bra，若隱若現勁誘惑，即使大住肚身材依然弗到爆，一樣可以咁性感火辣！
佢又借住自己升呢人母嘅感受，感激媽媽嘅偉大：「懷孕只是一個過程，卻迎來一輩子的陪伴，成為兩個孩子的媽媽，深深感受母親的偉大，謝謝我媽媽孕育了今天的我，讓我有機會延續這份愛。謝謝您在我任性，無理的時候依然守護我，愛我。在您身邊，我永遠都是小孩子，感恩我能夠擁有。母親節快樂，媽媽我愛您。」
