企業強人｜謝東閔演二世祖靠煲《大時代》攞靈感

李芷晴與角色一性格差異大演技被考起

TVB劇集《企業強人》昨晚（20日）播出的第五集有兩大高潮位，劇情講述姜大衞John哥飾演的「商界老狐狸」邢文浩於公開場口突然心臟病發暈倒，送院後一直昏迷。

趙愷（陳豪飾）依照邢文浩病發前吩咐，向三名子女——大仔Vincent（謝東閔飾）、二仔Michael（吳子沖飾）及小女兒Emma（李芷晴飾）宣讀邢文浩一早寫好的財產分配，方芳（龔嘉欣飾）的私生女身份亦因而被公開。

對於要與來歷不明的外人分家產，以敗家見稱的二世祖Vincent大感不滿，即場大吵大鬧、逼令Michael及Emma聯手對付方芳，還向遠道趕來醫院的方芳單單打打，嘴臉極之討厭。

更不幸的是，作為敬圖集團主腦的邢文浩昏迷期間，竟驚現大冧市，Vincent被逼上場指揮大局，卻因能力欠奉及不斷發脾氣令事情亂上加亂，最終Emma致電徐道明（譚俊彥飾）求救，邢文浩亦在此時甦醒‥‥‥

昨晚表現最搶眼的絕對是聲大大、冇貨賣的「二世祖」謝東閔，不但舉手投足夠浮誇、臉部表情夠繃緊、聲線亦夠曬吵耳，再加上角色性格自帶無能，整體頗有記憶點，有網民讚謝東閔夠火爆之餘，做戲亦確實有進步。

據知，原來謝東閔的角色原型是《大時代》中的浮誇衰格丁益蟹，平時說話斯斯文文的他為了增加火氣感，監製羅永賢（Marco）事前著謝東閔翻煲《大時代》找靈感，對此東閔笑言確實有助入戲：「監製Marco係有叫我睇《大時代》，我睇完都有少少入咗一個衰衰地格二世祖嘅感覺。呢個戲都幾攰㗎，因為我本身唔係咁嘅人。」

至於近日憑《愛‧回家之開心速遞》成為網民至愛的李芷晴（Stephanie），及近年參與了不少劇集拍攝的吳子沖，在劇中演出的角色亦與自身性格反差極大，當中飾演睿智千金律師的Stephanie。

開劇前還吸收法律資訊幫助入戲：「邢佩樺Emma呢個角色都真係我入行以嚟比較多戲分嘅一個，好記得當初收到消息要入劇做Emma時好興奮，但同時又好擔心自己會做得唔好，所以好早就開始睇劇本研究。因為Emma係讀law嘅，所以事前都有上網溫嚇書、睇嚇資料。」

Stephanie又透露角色性格與自身差別頗大，並笑言與子沖「撈亂本色」：「我演嘅時候都好擔心自己未必做到嗰種貴氣、但又善良貼地親切嘅感覺，加上呢個角色聰明又相對冷靜，同我本身嘅性格都幾唔同，我屋企人都笑我話套劇最考我演技就係我要扮聰明，哈哈！我同二哥（吳子沖）間唔中都講笑話喺劇入面，我同佢真人嘅性格好似掉轉咗咁樣。」

Stephanie又指John哥鏡頭前雖然氣場十足，但其實私下勁好人及照顧後輩，更是「片場暖場王」：「John哥間唔中會講笑，所以成個拍攝氣氛都好開心。」