劉江親身上陣拍追殺戲：好彩跑開步 曾拒接《誤判》跟馮皓揚演爺孫

劉江（劉老師）和馮皓揚（羊羊）在電影《誤判》中初次合作，戲中飾演爺孫，但劉老師最初一度拒拍，因自覺近年跑步後變得更醒，同角色唔多似，但最後被甄子丹誠意打動。

戲中劉老師有場逃避追殺戲，要跟子丹在停車場喪跑，他笑言好彩有跑步習慣，完全難不到他，又讚早在拍電視時合作過的子丹很照顧他。

採訪：杜杜 攝影：孔子 髮型:Jun@BHC化妝:Chloe Yu

劉老師最初收到演「馬伯」邀請時，一度不肯接拍，「我跑步後個look唔同咗，好聽啲就係醒啲，呢個角色唔係好啱，電影同電視唔同，電視可以慢慢洗觀眾腦，但電影唔得，要一行出嚟就要係，演技再好，如果唔係好夾個角色，都係失敗。」

電影公司跟他多次溝通不果，連他太太也忍不住開聲，「佢話『』你拍唔拍都同人講聲啦！』即係要我攤牌。」最終子丹一句「我哋想辦法」，全力協調令劉老師安心演出。

子丹問劉老師意見

談到跟羊羊合作，劉老師大讚「乖孫」表現，「對住新人就好似嚿麵粉，要幫佢捏嚇，但佢埋位好成熟，好多嘢按部就班，我都唔使照顧佢，反而我要做好自己，唔係唔掂呀！哈哈！」

羊羊反指是「爺爺」令他更易投入感情演出，「有個劉老師咁好嘅對手喺度，好多嘢唔使去諗，靜心望住佢就知想表達咩，唔使再去修飾，好自然就可以做到。」

劉老師笑著話，「搞錯！你講到我咁勁，我都冇覺得自己咁勁，你知唔知？其實劉老師係一個花名嚟咋！哈哈！」羊羊反駁，「我哋拍一cut機時，甄生（子丹）都走過嚟問老師意見㗎！哈哈！」

講到跟子丹合作，離不開有動作場面，羊羊就大歎未有機會見識，而劉老師卻有場跟子丹在停車場逃避追殺戲份，劉老師坦言未拍前完全不擔心，「但拍嘅時候我都有啲擔心，哈哈！因為真係自己跑，第1次拍後面架車就住我揸，梗係唔似，要再嚟過，我就真係跑到呢，好彩我有跑開步咋，哈哈！不過甄生都有睇住我。」

原來劉老師早在80年代已跟子丹合作過，「喺TVB拍過電視電影，𠵱家佢sharp咗，好有主見去handle每場戲，但佢一向都好照顧我。」