麵包店店員被斥態度惡劣

唐詩詠回應爭議：服務性行業真係唔容易

唐詩詠和朋友合資開設的日式麵包專門店，開業至今每天大排長龍。唐詩詠雖然貴為視後，經常現身店內打點，更落手落腳整麵包、搬搬抬抬及招呼客人。早前麵包店曾被質疑衛生標準，詩詠強調觸摸麵包前一定換手套或消毒。

近日有網民在小紅書發文，斥店員態度差，該網民稱當天要排隊半小時，才進入麵包店：「入去都未睇完有咩品種麵包，就比店員催著要咩麵包，急急腳埋單，仲要畀個店員丟張小票喺張檯度，難道我冇畀錢？入去唔夠兩分鐘就走了，下次請我都唔去（兩個店員尤其惡劣，一個鬈毛小哥，另一位忘記咩樣了）好想問一下你哋係咪想趕客？」

面對網民不滿及爭議，唐詩詠昨天（15日）在Ig限時動態貼出2位店員的背影照，並寫道：「呢兩位無乜工作經驗，20歲嘅年輕人，由開業到現在同我哋一齊經歷咗唔少，當中少不免學習﹑犯錯﹑不過我感恩，佢哋雖然年紀細，但會承認自己嘅錯誤，呢方面要讚一下，而佢哋都好努力地去學習。

服務性行業有好多事需要學習，例如語氣啦﹑講嘢要有尾音啦，即使失戀或者心情唔好，都唔能夠帶返公司㗎，我哋會一路積極地培訓員工，如有需要再加心理嘅輔導，（我主要負責失戀嗰part）服務性行業真係唔容易，我哋一齊加油啦﹗」