娛樂
羅子溢38歲生日陪子女玩水慶生！楊茜堯祝賀老公愈來愈型仔
羅子溢「雙牛一」樂做湊仔公楊茜堯賣口乖：我家大人！
藝人羅子溢系廿四孝老公兼好爸爸，自從太太楊茜堯為佢誕下一對仔女後，佢除落力搵奶粉錢外，公餘時間就全部畀曬仔女，連昨日（28日）佢38歲生日，仲要系機會難得西曆同舊曆生日撞正同一日嘅「雙牛一」大日子，佢都繼續樂於做湊仔公，一家四口玩水中度過，凡事以小朋友行先，認真偉大。
佢留言笑指：「今日系咩日子呢？家庭樂嘅日子，炎炎夏日最好嘅娛樂，快樂就系咁簡單，舊曆新曆同一日，19年一遇。」老婆楊茜堯即送上祝福：「Happy birthday 我家大人！祝你身體健康，一直一直咁靚仔，一直一直咁有型，一直一直咁開心！」
羅子溢接受東網訪問，透露拍畢《婚後事》後至年尾先再開劇，剛過完生日，就即為囡囡「小珍珠」開學做足準備，添置白波鞋等上學物品。
佢表示：「其實咁大個人，依家生日簡簡單單過就算，主要都系湊仔湊女緊要啲，因為佢哋大得好快，生日願望最想仔女開開心心、健健康康、聽教聽話。」
佢又指現時為仔女成長問題感煩惱，阿仔唔肯瞓，阿女就唔願食，吸收唔到足夠營養，所以要多陪囡囡放電，希望佢更有胃口進食，笑言陪玩仲忙過返工，又慶幸能有時間能與仔女朝夕相處，不錯過其成長嘅珍貴時刻。
文章來源：網易娛樂
