為《法證V》挨到腰斷頭髮白！黃宗澤不做視帝只求圓導演夢

問他的角色有不少化學專用名詞會否吃力？「要死背，不過編劇好好，做好多資料搜集去解釋，有時不需要死背，不過做實驗的手勢及程序都要學，公司安排專人教。現時的劇集製作有好大進步，無論道具、場景、劇本及拍攝手法跟以前不同，成個法證辦公室場景都系搭出來，好真實、好靚。」

無諗過同林敏驄爭視帝

效力TVB 22年的Bosco，曾拍過數十部劇集，可惜與視帝無緣，今年台慶頒獎禮可有信心憑《法證V》稱帝？「同林敏驄爭？無呀，從來唔諗，拍一部劇觀眾睇得開心、覺得好睇緊要過攞獎。（會否覺得咁多年欠個獎被肯定？）唔覺得，在街上當面被人贊更大認同，攞獎要時也命也配合好多因素，現時心態是希望拍好個作品就得，現階段仍學習中。」

拍攝期間Bosco化身副導幫手執頭執尾，問他有沒有諗過當導演？「有諗過，亦有傾過開拍電影，但奈何太忙，而且好劇本難求，尤其是第一部要考慮好多問題。（會否為電視劇當導演？）20集太長，如果集數少又可以研究。當一個練習，最好唔好自己演埋，張家輝也說千祈唔好，24小時不夠用，演埋主角死得！」

冇拖拍都唔覺Dry

疫情以來Bosco的工作沒受影響，過去1年多，他拍了3部劇集及4部電影，他笑謂：「餐廳生意大受影響，感恩自己的工作沒有停過，片酬可以填番餐廳所蝕。（疫情以來餐廳蝕了幾多錢？）千祈唔好計、唔好諗，諗就驚，而且諗都無謂，反正不會執咗去，餐廳員工涉及10多個家庭，始終不想員工失業，頂到就頂，不如諗往後如何賺錢填番條數。（有什麼大計？）提高好的食物及服務，各方面儘量做到最好，大家多些來幫襯。」

至於感情生活，Bosco說：「都系咁，拍了3部劇、4部電影邊有時間，人唔死仲健在都算好彩，都系個句，遇到就遇！（與內地網紅方禾齊傳出緋聞？）仲提，完全唔認識，當日是朋友約食飯，只是同台打招呼傾了幾句，與對方兒子的朋友影咗張相，連對方的名字也不知，Don\'t屈我！

冇拍拖但唔覺得dry，日日開工好豐盛。（媽咪恨飲新抱茶及抱孫？）邊個講，阿媽的應酬及活動多過我，懶得理我，出身單親家庭哪有這個畫面，我不恨結婚、生仔，完全冇計畫幾時結婚，生幾多個小朋友，隨緣。（不恨結婚生仔，恨什麼？）恨當導演、恨去旅行，疫情前在馬來西亞買樓，差不多要收樓，希望可以去行個圈，當地好多朋友，變相多個地方度假。」