李婉華評劇慘被煽動人身攻擊！直斥王晶行為賤格：不是朋友
婉華揶揄說：「反而拍佢啲戲，做戲唔使咁叻，因為有啲演員賣身材，有啲就賣關係。」問到係咪冇朋友做？她即割席：「不嬲係導演跟演員關係，講唔上係朋友，朋友係唔會傷害對方嘅。」
睇王晶戲唔使用腦
因為少睇港劇，李婉華唔知《一》劇由王晶製作，強調就算知道都以事論事，作為家長要灌輸正確道德觀念畀子女，竟遭王晶反擊，指她「那麽有道德就教好你的加拿大女兒，守住處女到40歲。」
婉華笑言：「大人唔需要講呢啲嘢呀，仲講埋人哋個女，但如果人哋講返佢，佢可能會10倍奉還，我諗佢係揀人(開刀)嘅，覺得我幾好蝦！哈….好多人戥我不值！我唔嬲，只係突顯佢係乜人，咁大個人要積嚇口德啦，呢班人喺80、90年代都攞盡曬好處，如果我係佢會提攜多啲年青人，傳承電影。」
婉華更斥好勇鬥狠嘅人好難有好作品：「用鬧人、踩人及做啲煽動言論，令人互相攻擊，我覺得好賤同唔理智囉！希望香港人個個都可以開開心心，珍惜返我哋擁有嘅有人及事，點解要互相攻擊呢？我哋睇佢啲戲都係想唔用腦尋找娛樂。」
安慰姜濤勿介意肥瘦
提到近年港產片，婉華大讚《正義迴廊》，導演何爵天拍得好、麥沛東及楊偉倫演得好，讀過演藝學院的婉華，好開心演藝學生得到業界認同；
至於賈勝楓執導的《流水落花》、陳小娟的《淪落人》都係好戲。
至於新晉演員，婉華力推「教主」盧瀚霆：「我好鍾意睇佢同呂爵安CP劇《大叔的愛》，連汁都撈埋，又好花心地鍾意埋既乖仔及靚仔嘅姜濤。」
對於姜濤個唱海報被惡搞變大肥仔，婉華作出安慰：「唔好理人點講，鍾意你唔會介意你肥定瘦，喺媽媽級角度，見到佢肥仲開心，最重要係健康開心，肯食嘢咪仲好。」婉華又溫馨提示教主要多休息。
另外，對19歲的囡囡Natalie想入行，婉華叮囑她要先讀好書磨利把刀，只有知識帶唔走：「好似豬肉威(劉宋威)係最佳例證，佢戴咗口罩一雙電眼令人有幻想，但除罩大家喜唔喜歡就自行判斷，要成為被追捧及受欣賞偶像，係唔可以齋擺甫士，必須有才藝及人品。」
責任編輯：
